గ్రీన్ సిటీస్

గ్రీన్ సిటీస్

భారత దేశంలో అందరికి సొంత ఇల్లు ఏర్పరిచేందుకు కేంద్ర ప్రభుత్వం  '2022'వ సంవత్సరం వరకు టైం లిమిట్ పెట్టుకొని పని చేస్తోంది. అయితే ప్రజలకు ఇది ఒక ఉద్ధరింపు పధకంలా గాక, దేశ ఆర్ధిక ప్రగతికి ఉపయోగపడే ఆయుధంగా మార్చాలనేది నా మనవి. పెద్ద సంఖ్య లో దేశం మొత్తం స్మార్ట్ సిటీస్ కూడా అభివృద్ధిచేయాలనుకుంటున్న ప్రభుత్వం, అందులో భాగంగానే ఇళ్ళ నిర్మాణాన్ని చేస్తే బహుముఖ ప్రయోజనంగా ఉంటుంది. అయితే ఇప్పటి వరకు రోడ్డు మార్గం ఆధారంగా ఇళ్ళ నిర్మాణాలు జరిగాయి. ఇప్పుడు రైల్వే ట్రాక్ వెంట, మహా నగరాలకి యాభై కిలోమీటర్ల పరిధిలోని చిన్న స్టేషన్ల కేంద్రంగా రెసిడెన్షియల్ కాలనీల నిర్మాణం చేయాలి. అయితే నగరాలను కాంక్రీట్ జంగిల్స్ గా మార్చిన అపార్ట్ మెంట్ నిర్మాణాల జోలికి వెళ్ళకుండా ఇండిపెండెంట్ ఇళ్ళు కట్టేందుకు ప్రభుత్వాలు ప్రయత్నించాలి. దేశమంతా ఆఫీసులు, వ్యాపార సంస్థలు మినహాయించి, నివాసానికి బహుళ అంతస్తుల భవనాలు కట్టకుండా చట్టం చేయాలి. ఇది కొంత అతిశయోక్తిగా అనిపించవచ్చు. అంత భూమి ఎక్కడిది, పంటపొలాలు నాశనం చేయాలా, అడవులు నరికివేస్తారా అనే అనుమానాలు రావచ్చు. వాస్తవంగా చుస్తే ప్రపంచ భూభాగంలో మానవ నివాసాలకు వినియోగిస్తున్నది కేవలం మూడు శాతం మాత్రమే. అందుకే ఇంత కాలుష్యమా అనే అనుమానం రావచ్చు. కానీ మనం చేస్తున్నది ప్రకృతికి హానికలిగించే అభివృద్ధి.        

పెద్దయెత్తున అపార్ట్ మెంట్ నిర్మాణాల వలన ప్రకృతికీ, భూమికి జరుగుతున్న అపార నష్టాన్ని గుర్తించాలి. 

ఆరు వందల గజాల స్థలంలో నాలుగు ఇండిపెండెంట్ ఇళ్ళు కట్టే చోట, ఐదు అంతస్తుల భవనం కట్టి, అందులో ఇరవై ఫ్లాట్స్ నిర్మిస్తున్నారు. అంటే నాలుగు కుటుంబాలు నివసించే భూమిని ఇరవై కుటుంబాలకు విస్తరించారు. ఈ 20 కుటుంబాల నీటి అవసరానికి, ఎంత లోతుకైనా బోరు వేయడం, భూగర్భ జలాలన్ని తోడెయ్యడం నగరాల్లో రోజూ జరుగుతున్నప్రకృతి వినాశనం. అంటే సహజ సిద్దంగా వర్షపు నీరు భూమిలోకి ఇంకే వీలు లేకుండా అపార్ట్ మెంట్లు నిర్మించి నాలుగు కుటుంబాలు వాడుకోవలసిన నీటిని '20' కుటుంబాల కోసం ఎక్కువ లోతులో, పెద్ద-పెద్ద బోర్లు వేసి లాగేయడం జరుగుతోంది. అంతే కాదు జీవనాధారమైన ఆక్సిజన్ ను అందించే చెట్లను పెంచడానికి వీలు లేకుండా, ఉన్నవి కొట్టేసి పెద్ద ఎత్తున కడుతున్న అపార్ట్ మెంట్ల వల్ల ప్రకృతి సమతుల్యం వేగంగా దెబ్బ తింటోంది. చెట్లు ఉంటే ఇతరత్రా జీవరాశులు, ఉడుత, తొండ, ఎలుక, చిన్న చిన్న పురుగులు, వాన పాములు, వంటివి కాలానుగుణంగా భూమికి, మనుషులకి, ప్రకృతికి, మధ్య సమతుల్యానికి ఉపయోగపడతాయి. దేశం మొత్తంలో ప్రతి ఇంటికి ఒక ఆవు(గోమాత)ను పెంచితే మానవ జాతి అంతటికి ఆరోగ్యం, సుభిక్షం సహజ సిద్ధంగా లభిస్తాయి. 

    కనీసం 200 గజాల్లో ఇండిపెండెంట్ ఇళ్ళ నిర్మాణం వలన ఎక్కువ భూ విస్తీర్ణంలో తక్కువ భూగర్భ జలాల వినియోగం వలన భూమి అడుగు పొరల్లో సమతుల్యత ఏర్పడి నీటి నిల్వలు పెరుగుతాయి. ఊరే అవకాశం ఇవ్వకుండా నీరు తోడితే,ఎంతటి బావి అయినా ఇంకి ఎండిపోవడం ఖాయం. రెండు వందల గజాల స్థలంలో 1500ల చదరపు అడుగుల విస్తీర్ణంలో డబుల్ బెడ్ రూమ్ ఇంటి నిర్మాణం చేసి, మిగిలిన స్థలంలో కనీసం నాలుగు చెట్లు పెంచే విధంగా అవకాశం ఏర్పరచాలి. 

ఈ స్థలంలో ఎటువంటి అదనపు నిర్మాణానికి అవకాశం లేకుండా, స్థానిక ప్రభుత్వాల ద్వారా నియంత్రించాలి. మరీ అవసరమైతే డబుల్ బెడ్ రూమ్ విస్తీర్ణంలోనే మొదటి అంతస్తు నిర్మాణానికి అనుమతించాలి. ఇంట్లో చెట్లను గాని, రోడ్లపై చెట్లను గాని ఎట్టిపరిస్తితులలో తొలగించటానికి వీలు లేకుండా చట్టాలు చేయాలి.         

భూమి విలువలు పెరగడం, జనావాసాలకు కొరత ఉండటం వాస్తవమే, అయితే అపార్ట్ మెంట్ల నిర్మాణమే అందుకు పరిష్కారంగా భావించి ప్రోత్సహిస్తే, భవిష్యత్ తరాలు భూగర్భ జలాలు లేక, భూమి పొరల్లో సంభవించే పెను మార్పులకు బలి కావాల్సివస్తుంది. ఈ పరిస్థితిని అధిగమించేందుకు, నగరాలకు దగ్గరలోని రైల్వే స్టేషన్ల వద్ద సకల సౌకర్యాలతో టౌన్ షిప్ ల నిర్మాణం చేపట్టాలి. ఈ స్టేషన్ ల మీదుగా ప్రధాన నగరానికి నిరంతరం లోకల్ ట్రైన్స్ నడిచే ఏర్పాటు చేయాలి. అందుకు అవసరమైన ప్రత్యేక లైన్ లు నిర్మించుకోవాలి. కేంద్ర, రాష్ట్ర, స్థానిక ప్రభుత్వాల సమన్వయము తో భూమిని గుర్తించి సేకరిస్తే '5' లక్షల రూపాయలతో అన్ని సౌకర్యాలతో అందరికి ఇండిపెండెంట్ ఇళ్ళు కష్టమేమి కాదు. వీటిని గ్రీన్ సిటీస్ గా అభివృద్ధి చేస్తే పర్యావరణానికి ఎంతో మేలు జరుగుతుంది. గ్రీన్ సిటీస్ అంటే, నిర్మాణ సమయంలోనే రోడ్ల వెంట ఎటువంటి మొక్కలు నాటితే ఎక్కువ ఆక్సిజన్ విడుదల చేస్తూ చల్లదనాన్ని అందిస్తాయి, అవి ఏ డైరెక్షన్ లో నాటితే చెట్లుగా పెరిగి ఆప్రాంతమంతా సమశీతోష్ణ స్థితిని కలుగజేస్తాయి, ఇంటికి రెండు వేప చెట్లు ఆరోగ్యాన్ని ఎలా కాపాడతాయి అనే బహుముఖ విషయాలను విశ్లేషించి నగరాలను నిర్మించటం. దీని ద్వారా కృత్రిమ సమశీతోష్ణ స్థితిని అందిస్తున్న ఎయిర్ కండిషనర్లు, రిఫ్రిజిరేటర్ల వాడకాన్ని అవసరం లేని కారణంగా ప్రజలు స్వచ్చందంగా ఆపివేస్తారు. 

గ్రీన్ సిటీస్ నిర్మాణంతో, సీలింగ్ ఫ్యాన్ వాడకం కూడా అవసరంలేని చల్లనైన వాతావరణాన్ని సహజ రీతిలో కల్పించవచ్చు.    

 గ్రీన్ సిటీస్లో భాగంగానే సంపన్న, మధ్య తరగతి, నిరుపేదలు ఇలా వర్గాలవారిగా వారి స్తోమతను బట్టి, పరస్పర అవసరాలను గుర్తిస్తూ ఇళ్ళను నిర్మించవచ్చు. 

ప్రభుత్వ వ్యవస్థల్లో పెద్దమొత్తంగా ధనం వృధా అయ్యేది, రోడ్లు వేసిన తర్వాత డ్రైనేజ్ నిర్మాణం కోసం తవ్వేయటం, డ్రైనేజ్ పనులు పూర్తయ్యాక వాటర్ పైప్ లైన్స్ ఏర్పాటుకోసం మళ్లీ తవ్వటం ఇలా పలు శాఖల మధ్య సమన్వయం లేక మళ్లీ మళ్లీ నిర్మాణాలు చేయాల్సి రావటం ప్రధాన కారణం.   

  ఈ వాస్తవాన్ని ప్రభుత్వాలు గుర్తించి గ్రీన్ సిటీస్ నిర్మాణ సమయంలోనే అండర్ గ్రౌండ్ డ్రైనేజ్, అండర్ గ్రౌండ్ ఎలక్ట్రికల్ లైన్స్, వాటర్ పైప్ లైన్స్, గ్యాస్ పైప్ లైన్స్, ఆప్టిక్ ఫైబర్ కేబుల్స్, రోడ్స్ వంటి మౌలిక సదుపాయాలను కల్పించాలి. అదే సందర్భంలో నీటి నిల్వకు సరోవరాలు, ఉద్యానవనాలు, స్కూల్స్, కాలేజీలు, ఆసుపత్రులు, కమ్యూనిటి హాల్స్, ప్రభుత్వ కార్యాలయాల సముదాయాలు, పశు పాలక కేంద్రాలు, మాల్స్, షాపింగ్ కాంప్లెక్స్ లు. ప్రార్ధనా స్థలాలు, స్మశాన వాటికలు వంటి నిర్మాణాలకు అనువైన స్థలాలు గుర్తించి ఏర్పాటు చేయాలి.  

ఒకే ప్రాంతంలో గ్రూపుగా కొన్ని వేల ఇళ్ళ నిర్మాణం అంటే అందుకు అవసరమయ్యే  స్టీలు, సిమెంటు వంటి నూట యాభైకి పైగా రంగాల ఉత్పాదనలకు అవసరం ఏర్పడుతుంది. ఆయా రంగాలను గుర్తించి, ఈ యాభై కిలోమీటర్ల పరిధిలో వాటి ఉత్పత్తులు తయారు చేసే విధంగా ప్రోత్సహిస్తే, రవాణా వ్యయం నియంత్రించవచ్చు. 

చాలా మందికి ఉపాధి కూడా దొరుకుతుంది. భూమి, ప్రకృతి పరిరక్షణే ధ్యేయంగా ప్రభుత్వాలు ఇటువంటి నిర్మాణాలకు ఉపక్రమించాలి. బహుళ అంతస్థుల భవనాలే అభివృద్ధికి సూచికగా భావిస్తే, భూగర్భంలో కలిసిపోయే ప్రమాదాన్ని విస్మరించ కూడదు. ప్రజలకి ఇళ్ళు అవసరం, ఆ అవసరాన్ని ప్రభుత్వాలు తక్కువ ఖర్చులో తీర్చుతూ, అందుకు వివిధ రంగాల ఉత్పాదకతకు ప్రోత్సాహమిస్తూ, తద్వారా ఉపాధి అవకాశాలను పెంచటమే దేశ ఆర్ధిక ప్రగతికి సోపాన మార్గం.