జీవన శైలి

జీవన శైలి

  ప్రపంచ ఆర్ధిక వ్యవస్థకు మూలమైన ఎన్నో విషయాలు భారత ప్రాచీన విద్యా విధానం ద్వారా రూపొందినవే. సున్నా (జీరో) దశాంశ స్థానాలు వినియోగం నుంచి రాజనీతి శాస్త్రం వరకు ఎన్నింటినో మన పూర్వీకులు స్పష్టమైన వివరాలతో భావితరాలకి అందించారు. 
అద్భుత కట్టడాలను అలవోకగా నిర్మించిన ఇంజనీరింగ్ ప్రతిభ అప్పటికే మన సొంతం.

అరవైనాలుగు కళలలో ఆరితేరిన నైపుణ్యం భారతీయులది. ఖగోళ విజ్ఞానం, సూర్య, చంద్ర, నక్షత్ర గమనాలను లెక్కలు 

కట్టి పౌర్ణమి , అమావాస్య, గ్రహణాలను చెప్పిన చరిత్ర మనది.

అయితే బ్రిటీష్ వారి బానిసత్వంలో మనదేశంలోకి విదేశీ విద్యావిధానం చొరబడింది. మంచి ఎక్కడున్నా నేర్చుకోవటం తప్పుకాదు. కానీ మన ఉనికి మరచి వాళ్ళ విధానాలకు ఆకర్షితులయ్యాము. ఫలితంగా విద్య ద్వారా విజ్ఞానవంతులయ్యే పరిస్థితులు క్రమంగా మారిపోతున్నాయి. చదువుతో సంస్కారం, విజ్ఞానం, మానవతా విలువలు నేర్చుకునే పధ్ధతి ఎప్పుడో వదిలేసాము. చదువంటే పెద్ద జీతాలు వచ్చే ఉద్యోగాలు పొందేందుకు అవసరమైన డిగ్రీలు సాధించే వ్యవస్థగా మార్చుకున్నాము. విదేశీ విధానాల అనుకరణలో, మన ప్రాచీన జీవన శైలి గొప్పదనాన్ని విస్మరించాము. 

ప్రకృతిని దైవంగా కొలిచే భారతీయ సంస్కృతిని, విదేశీ వ్యాపార మాయలో పడి పూర్తిగా మర్చిపోతున్నాము.       

ఎందుకంటే మనుషుల కృత్రిమ సుఖాలకోసం పర్యావరణానికి హాని చేసే అనేక ఉత్పత్తులు, ప్రపంచవ్యాప్తంగా లక్షల కోట్ల రూపాయల మార్కెట్ కలిగి ఉండటం ప్రధాన కారణం.

అంటే సామాన్యులకు కూడా అందుబాటులోకి వచ్చిన ఎయిర్ కండిషనర్లు, రిఫ్రిజిరేటర్లు, యూరియా, ఫెర్టిలైజర్లు, పెట్రోలియం ఉత్పత్తుల అపరిమిత వినియోగం, వీటలో ఒక్కటి సైతం ప్రభుత్వాలు నియంత్రించలేవు.
అదేవిధంగా ఇష్టానుసారం బోర్లు వేసి భూగర్భ జలాలను తోడెయ్యటం, గ్యాస్, బొగ్గు, ఐరన్ ఓర్ వంటి ముడి ఖనిజ సంపదను విచ్చలవిడిగా వెలికితీయటం, దేవదారు, ఎర్ర చందనం అక్రమ ఎగుమతులు నిరోధించలేకపోవటం వంటివి కూడా ప్రభుత్వాల వైఫల్యాలు.

భారతదేశంలో, మన ప్రాచీన, సంప్రదాయ వ్యవసాయ పధ్ధతులు, ప్రకృతితో మమేకమయ్యే ఆచార, వ్యవహారాలతో కూడిన ప్రజా జీవన శైలిని విస్తృతరీతిలో ప్రభుత్వాలు ప్రోత్హహించాలి.